Í dag hjóluðu þeir um 500 km, Eru ca. 200 km frá borginni Chita.

Byrjuðu í leiðindaveðri í morgun, grenjandi rigningu en svo lagaðist það þegar leið á daginn. Vegirnir malbikaðir og góðir og mikið af skóglendi.

Eru búnir að tjalda og sátu við varðeld þegar þeir höfðu samband. Vildu ekki samþykkja að stemningin væri "rómantísk" þarna hjá þeim, til þess vantaði þá betri helmingana sína, en ósköp notalegt gátu þeir játað, og ánægðir með daginn.

Stjörnuspáin hans Einars fyrir daginn í dag hljómar svona: Stjörnurnar biðja þig um að forvitnast um heiminn þinn, ekkert minna. Þeim finnst þú nefnilega bæði hugrakkari og klárari en þér finnst sjálfum.

Sverris stjörnuspá er: Þér finnst þú vera að drukkna í vinnu. Þú leggur mikið á þig og haltu því áfram. Þú verður brátt verðlaunaður á glæsilegan hátt fyrir dugnaðinn.

Hvað er svona ferð annað en mikil vinna. Stundum er gaman að velta þessum stjörnuspám fyrir sér bæði í gamni og alvöru. En satt er að bæði eru þeir hugrakkir og duglegir!

Þá eru þeir komnir til Rússlands aftur. Það tók um 5 klst. allur sá pakki, bið og pappírsvinna. Landamæraverðirnir skoðuðu vel og lengi passana þeirra enda ekki margir íslendingar þarna á ferðinni. Annars var mikið af fólki frá Mongólíu að fara yfir og greinilegt að það er vel athugað áður en því er hleypt inn í landið.

Hjóluðu samtals um 400 km.  Nú er 9 klst. munur.

Eru komnir til Ulan-Ude og eru á hóteli þar, uppi á 9 hæð og voru á leið í sturtu en eitthvað var langt í heita vatnið svo hún hefur eflaust verið köld blessuð sturtan.

Hjólunum var komið fyrir í kjallara hótelsins innan um alskyns leiðslur og snúrur.

Fara að Baikalvatni á morgun og svo áfram í austur!

Í dag fengu þeir vísaáritunina eins og áætlað var, og voru tveir kátir bræður sem héldu af stað áfram ferð sinni hringinn í kringum hnöttinn.

Hjóluðu 220 km. en þeir lögðu ekki af stað fyrr en um kl. 5 eftir að hafa fyllt á bensín og gert allt klárt.

Hittu Ástrala á sextugs aldri sem hefur verið að ferðast út um allan heim á mótorhjóli. Spjölluðu við hann og þáðu góð ráð.

Gátu eldað kvöldmatinn á eldunargræjunum loksins en þeir fengu réttan bensínbrúsa í Ulan-Batar. Eins fjárfesti Einar í nýrri dýnu, en hin hafði "punkterað" og því ekki mikil not í henni þannig. Fundu smá drag til þess að tjalda í fyrir nóttina og halda til Baikalvatns á morgun. En fyrst er að komast aftur inn í Rússland og vonandi gengur það vel.