Enn eru þeir staddir í Ridgecrest en varahlutirnir komu ekki í dag eins og var búið að lofa en eru

væntanlegir á morgun. Þannig að þegar þeir koma verður tekið til við að koma öllu í lag og svo er

spurning hvort þeir halda áfram yfir til Las Vegas seinnipartinn á morgun eða bíða eina nótt í viðbót og

fara eldsnemma næsta dag. Það er mælst til þess að fara frekar í fyrra fallinu þarna yfir þegar 

hitinn er  ekki alveg í toppi.

Harley bræður (Dossi og Skúli) ætla að halda yfir Death Valley snemma í fyrramálið og fara til Las

Vegas.

Eru ennþá í Ridgecrest. Vélin hjá Einari var eitthvað að stríða honum í gær, svo þeir vildu kanna málið. Fengu ágæta aðstoð þarna á staðnum og fá varahluti með express á morgun. Engin stórkostleg vandræði, og búast við að geta lagt af stað seinnipartinn á morgun.

Harley bræður (Dossi og Skúli) nota tímann í hitaaðlögun enda veitir ekki af því hitinn getur farið upp í 40° C.

Minni á viðtalið við Sverri hjá Hrafnhildi á Rás 2 í fyrramálið fimmtudag eftir 8 fréttirnar! 

Dossi og  Skúli náðu í hjólin í morgun. Einar og Sverrir fóru í að skipta um síur og olíur á hjólunum sínum og gera þau klár fyrir ferðina. Svo um hádegisbilið var lagt af stað.

Hjóluðu um 300 km. til lítils bæjar sem heitir Ridgecrest og er svolítið norðar en þeir voru og í eyðimörkinni. Hitinn er búinn að vera um 35 - 40° C í dag, semsagt dáldið heitt en þeir bera sig vel.

Leiðin minnti mikið á Mongólíu nema nú var ekið á malbiki ekki malarvegi.

Á morgun fara þeir Death Valley sem liggur mest  86 metra fyrir neðan sjávarmál svo það er hægt að búast við miklum hita þar. Og áfram halda þeir  til Las Vegas! 

Dossi og Skúli eru komnir til þeirra í Santa Monica og var verið að snæða ekta amerískan morgunverð þegar þeir hringdu.

Höfðu skroppið aðeins á hjólunum í gær á stað sem hjólamenn hittast að venju á sunnudögum og kom þá ekki hjólandi á sínum gljáfægða fák enginn annar en Jay Leno. Auðvitað var aðeins spjallað og teknar myndir af þeim með honum. Þetta var skemmtileg upplifun og gaman þegar svona hlutir gerast.

Svo seinna í dag þá ætla þeir að fá að kíkja í kvikmyndaverið þar sem verið er að taka upp CSI-Miami en Egill Örn Egilsson, eða Eagle eins og hann er víst stundum kallaður, sem er kvikmyndatökumaður og vinnur við þættina hefur verið þeim innan handar þarna, tók m.a. á móti Skúla og Dossa á flugvellinum og ætlar að fara með þeim og sýna öll herlegheitin í Hollywood. 

Og svo hefur heyrst að Steinunn Ólína hafi hug á að taka við þá viðtal áður en lagt verður af stað á morgun. 

Spennandi hlutir að gerast en styttist óðfluga í heimkomu, og er fjölskyldan farin að hlakka til.